Најмалку 300 луѓе загинаа во Израел, а повеќе од 1.590 се ранети во голем напад на Хамас од Појасот Газа, според новите податоци објавени рано во неделата.
Ситуацијата во Израел сè уште не е целосно под контрола, бидејќи борбите со инфилтрираните милитанти на Хамас сè уште траат на југот на земјата, изјави рано во неделата портпаролот на израелската армија.
Во ненадеен напад, борците на Хамас упаднаа во Израел на неколку локации и зедоа како заложници десетици војници и цивили.
Во краток брифинг на социјалните мрежи, портпаролот на израелската армија рече дека големиот број цивилен и воен персонал земен како заложник од Хамас во саботниот ненадеен напад врз израелските градови во близина на Газа ќе ја обликува иднината на војната и она што Израел ќе го направи против Хамас.
Нешто претходно, портпаролот на вооруженото крило на Хамас во кратка видео порака изјави дека бројот на приведени израелски цивили „многу пати надминува неколку десетици“.
Еден од лидерите на Хамас, Салех ал-Ароури, во саботата за Ал Џезира изјави дека групата има голем број израелски затвореници, вклучително и високи функционери.
Тој рече дека Хамас има доволно затвореници за да го принуди Израел да ги ослободи сите Палестинци во неговите затвори.
Вооружени лица на Хамас дивееја низ израелските градови во саботата, убивајќи и заробувајќи десетици цивили и војници во ненадеен напад, а Израел одговори со масовни воздушни напади врз Газа.
Најлошиот напад врз Израел во последните децении предизвика војна за која двете страни ветија дека ќе ескалираат.
