„Google“, водечката единица на американската технолошка компанија „Alphabet Inc.“, ќе го зголеми производството на своите лаптопи „Chromebook“ во Индија, со што ќе стане најнов претставник на меѓународниот технолошки сектор кој ќе ги прошири своите производствени операции на клучниот пазар, пишува „Bloomberg“.
Компанијата ќе биде партнер со „HP Inc.“ за производство на „Chromebook“ во Индија, вели извршниот директор на „Alphabet“, Сундар Пичаи, кој сподели објава на платформата за социјалните медиуми „X“.
Овој потег ќе му помогне на „Google“ да ја зајакне својата понуда во Индија и да се натпреварува поефикасно во просторот на „Windows PC“ со имиња како „Dell Technologies Inc.“ и „Asustek Computer Inc“. Тоа е уште една победа за планот на премиерот на јужноазиската земја Нарендра Моди да привлече странски технолошки инвестиции во Индија преку програма од 2 милијарди долари.
Најнаселената нација во светот го проширува својот сектор за производство на електроника додека компаниите го диверзифицираат производството кон Кина во услови на зголемени тензии меѓу Пекинг и Вашингтон.
Локалното производство ќе му помогне на „Google“ да одржува стабилно снабдување во Индија и да избегне потенцијални ограничувања за увоз. Лаптопите „Chromebook“ генерално имаат ниски цени на пазарот и имаат мали маржи, што ги прави подложни на какви било тарифи.
Њу Делхи ги олеснува ограничувањата за увоз на лаптопи, таблети и друг компјутерски хардвер, давајќи им на производителите повеќе време да се подготват за потенцијалните ограничувања, објави претходно „Bloomberg“.
Лаптопите „Chromebook“ ќе се произведуваат во фабрика на „Flex Ltd.“ во близина на Ченаи, во јужна Индија, каде што „HP“ склопува лаптопи и десктоп компјутери од 2020-та година. Производството на „Chromebook“ треба да започне на 2-ри октомври, а овие лаптопи ќе бидат наменети првенствено за образовниот сектор.
