Полагањето на возачки испит за „Б“ категорија во Македонија се покажува како една од најголемите пречки за младите луѓе кои сакаат да станат возачи и да имаат сопствен автомобил.
Граѓаните се жалат дека упорно паѓаат на тестот за возење низ град дури и да не направиле никаква грешка, а како што велат, јавна тајна е дека секој кандидат за возач мора да падне најмалку 3 пати, па дури потоа да се надева дека ќе положи.
Ова не само што ги фрустрира и демотивира кандидатите, туку и ги изложува на дополнителни трошоци и загуба на време.
Еден од кандидатите кој се соочува со овој проблем е Александар, 23-годишен студент од Скопје.
Тој вели дека го туркаат веќе 5 пати иако јасно му кажуваат дека е добар возач.
Александар забележува дека вложил многу пари во ова и дека едвај чека да положи.
„Секогаш ми наоѓаат некаква грешка или изговор за да ме паднат. Еднаш ми рекоа дека не гледам во ретровизорите, друг пат дека не вклучувам трепкачи, трет пат дека не ги почитувам знаците. А сето тоа не е точно, бидејќи јас сум внимателен возач. Немам никакви проблеми со теоретската обука или со полигонот, туку само со возењето низ град. Мислам дека тоа е намерно, за да можат да земат повеќе пари од нас“, вели Александар.
Според Законот за безбедност на сообраќајот, кандидатите за возачка дозвола од „Б“ категорија мора да имаат најмалку 40 часови практична обука, од кои 10 часови се на полигон, а 30 часови се на јавен пат.
Покрај тоа, тие мора да положат теоретски испит со 40 прашања. Цената за еден час практична обука е околу 600 денари, а цената за полагање на испитот е 2.500 денари. Ако кандидатот не успее да положи од прв пат, тој мора да уплати повторно за испит и да почека најмалку 15 дена пред да може да се пријави повторно.
Ова значи дека Александар потрошил околу 29.000 денари за обуката и испитот до сега, а уште не знае кога ќе чуе: „честитам, положивте“.
Тој не е единствениот во оваа ситуација, бидејќи многу други кандидати споделуваат слични искуства и незадоволство. Некои од нив се обидуваат да ги избегнат овие пречки со корупција или врски, но не секогаш им успева планот.
Експертите со коишто разговаравме на оваа тема велат дека е повеќе од потребно да се направат промени во системот за полагање на возачки испит за „Б“ категорија во Македонија, кој ќе ги заштити правата и интересите на кандидатите, а истовремено ќе ги подигне стандардите за безбедност на сообраќајот.
Некои од можните мерки се: воведување на електронски систем за следење и оценување на кандидатите, обезбедување контрола на работата на комисиите, зголемување на бројот и квалитетот на инструкторите и возилата, подобрување на инфраструктурата и сигнализацијата на патиштата, итн.
Само со такви промени, порачуваат експертите, полагањето на возачки испит за „Б“ категорија ќе престане да биде кошмар за младите луѓе во Македонија.
Б.З.М.
