Врвниот кинески дипломат Ванг Ји е во посета на Русија на безбедносни разговори додека Москва бара континуирана поддршка за нејзината војна против Украина.
Неговата посета доаѓа по средбата на Владимир Путин со севернокорејскиот лидер Ким Џонг Ун, за која се сметаше дека ќе доведе до договор за оружје. Руските медиуми пишуваат дека патувањето на Ванг исто така ќе ја постави основата Путин наскоро да оствари значајна посета на Пекинг.
Претходно овој месец, Путин рече дека очекува да се сретне со кинескиот претседател Си Џинпинг, но не кажа кога. Тој не патувал во странство откако Меѓународниот кривичен суд издаде налог за негово апсење во март за воени злосторства во Украина.
Путин последен пат патуваше во странство во декември 2022 година кога ги посети Белорусија и Киргистан. Кинеското Министерство за надворешни работи соопшти дека Ванг бил во Русија четири дена на „стратешки безбедносни консултации“. Руската новинска агенција Тас, повикувајќи се на Кремљ, објави дека тој ќе се сретне со неговиот руски колега Сергеј Лавров и дека војната во Украина ќе биде клучна тема на нивните разговори. Тие, исто така, ќе разговараат за „проширувањето на силите и инфраструктурата на НАТО во азиско-пацифичкиот регион“ и зајакнувањето на нивната координација во меѓународните групи како што се ОН, се вели во соопштението.
Посетата на Ванг доаѓа неколку дена по мошне контроверзниот пречек на Путин на Ким, за кој, наводно разговарале за продажба на севернокорејско оружје на Русија. Се верува дека Москва се соочува со недостиг на оружје и муниција. Русија и Северна Кореја соопштија дека разговарале за „воена соработка“ и помош за сателитската програма на Пјонгјанг.
Запрашано за патувањето на Ким минатата недела, кинеското Министерство за надворешни работи одби да коментира, велејќи дека тоа е „нешто меѓу нивните две земји“. Но, некои аналитичари веруваат дека секоја взаемна поддршка меѓу Северна Кореја и Русија се случува со знаење или дури и премолчена согласност на Кина, со оглед на блиските врски на Пекинг со другите две земји.
Тие односи ја надминуваат социјалистичката идеологија и нивната заедничка недоверба кон САД и Западот. Пекинг долго време беше економски спасител на Пјонгјанг преку трговијата, а во изминатата година почна да станува и на Москва преку забрзаното купување на руска нафта и гас.
-Што и да се случува со Русија и Северна Кореја не може да се случи без Кина да знае за тоа… Мислам дека не би соработувале воено без одобрение од Пекинг – изјави Александар Королев, експерт за кинеско-руски односи од Универзитетот во Австралија. Кина дури може да ја види Северна Кореја како корисен застапник за помош на Русија во нејзината војна во Украина, додаде тој.
– Едноставно давање зелено светло на Северна Кореја да има воена соработка со Русија е начин да и се помогне на Русија по многу ниска цена на репутацијата. Тоа би можело да го обвини непријателскиот севернокорејски режим чии постапки немаат никаква врска со нив. Тоа би било паметен потег, ако е така – рече тој.
Посетата на Ванг на Русија, исто така, доаѓа еден ден откако тој се сретна со американскиот советник за национална безбедност Џејк Саливан во Малта. Покрај американско-кинеските односи, двајцата разговарале и за регионалната безбедност и војната во Украина, според изјавите објавени од САД и Кина. Додека САД можеби разговараат со Кина за да извршат притисок врз Северна Кореја да прекине каква било соработка, малку е веројатно дека Кина ќе го стори тоа, рече Королев.
– Ако Кина сакаше да игра на американски начин, имаше повеќе од една година да ја запре војната, но тоа не го стори – рече тој.
