Главниот град се соочува со сериозен проблем во сообраќајот. Според многу возачи и пешаци, семафорите во градот не се синхронизирани и не овозможуваат континуиран проток на возилата.
Ова предизвикува долги чекања, големи задржувања и зголемена загаденост на воздухот.
Инаку, „зелен бран“ е термин кој се користи за да се опише кога повеќе семафори се координирани за да се даде предност на една главна насока. Ова значи дека возачите кои ја следат таа насока и кои постојано се движат со 50 километри на час, можат да поминат низ повеќе крстосници без да застанат на црвено светло. Ова ја намалува потребата за кочење и забрзување, што ја подобрува безбедноста и ефикасноста на сообраќајот.
Но, во Скопје, таков „зелен бран“ не постои. Возачите мора да чекаат на секој семафор, понекогаш и по неколку минути, пред да продолжат кон својата крајна дестинација. Ова го прави патувањето до работа или до дома многу подолго и стресно.
„Секое утро чекам зелено светло на барем пет семафори од мојот дом до работното место. Тоа ми одзема драгоцени 10-15 минути, иако живеам само на 10 километри од центарот. Ова е неприфатливо. И не само што понекогаш доцнам на работа, туку и трошам повеќе гориво и ја загадувам околината, а исто така сум и прилично нервозна“, вели 32-годишната Софија Финовска од Ѓорче Петров.
Според Секторот за сообраќај на Град Скопје, една од нивните задачи е да ги следат и да ги анализираат состојбите во областа на сообраќајот во градот и да предлагаат мерки за нивно унапредување.
Но, до сега, не се забележани значителни подобрувања во организацијата и регулацијата на семафорите.
Додека надлежните институции си ја префрлаат одговорноста, граѓаните остануваат заробени во сообраќајниот хаос. Нивната единствена надеж е дека еден ден ќе можат да уживаат во „зелен бран“ и да патуваат низ градот без непотребни пречки и фрустрации.
Б.З.М.
