И покрај ограничувањата за увоз, Германија продолжува да увезува големи количества нафта од Русија преку Индија, објави во вторникот германската Федерална статистичка служба.
„Увозот на нафтени деривати од Индија се зголеми во првите седум месеци, во однос на истиот период минатата година, за повеќе од 12 пати“, објави Федералното биро за статистика, пренесува Хина.
Според Обединетите нации, Индија во истиот период увезла големи количини сурова нафта од Русија.
Кога станува збор за увоз од Индија, првенствено се работи за деривати кои се користат во производството на дизел или масло за греење.
Според Федералното биро за статистика, Индија увезува сурова нафта за производство на овие деривати исклучиво од Русија од почетокот на рускиот напад врз Украина.
Поради нападот на Украина, Германија го прекина директниот увоз на нафта од Русија, а западните земји воведоа ограничувања на цената на нафтата од Русија.
Неделникот „Шпигел“ објави дека, и покрај овие ограничувања, Русија сè уште добива многу повеќе од 60 долари за барел нафта, што е горната цена што ја одредуваат земјите од Г7 за нафтата од Русија.
Во изминатите неколку недели, германските медиуми сè почесто известуваат за тоа како Русија ги заобиколува западните економски санкции со увоз и извоз преку соседните земји како Казахстан.
