Кромидот, еден од најпопуларните и најчесто користени зеленчуци во македонската кујна, може наскоро да стане луксуз за сите нас.
Според некои проценки, килограм кромид есенва може да стаса и до 120 денари за килограм, бидејќи Индија – најголемиот извозник во светот, која покрива голем дел од глобалниот пазар, а од каде набавуваат и македонските пазари, воведе извозен данок од 40 отсто.
Очигледно оваа одлука на Индија ќе има директно влијание врз цената на кромидот во Македонија, бидејќи, како што посочуваат познавачите, земјава увезува околу 30 отсто од потребниот кромид. Останатиот дел се произведува локално или се увезува од соседните земји како Србија и Албанија.
Во моментот цените на кромидот на зелените пазари се повторно прифатливи – белиот чини 70, а црвениот и над 90 денари за килограм. Но, според земјоделците, ова е само привремена состојба и цената ќе почне да расте со зголемувањето на побарувачката.
„Секогаш имаме поголема потреба од кромид наесен и преку зима, а токму тогаш растат цените на овој зеленчук. Јас не знам како ќе го поднесам ова поскапување, бидејќи кромидот е неизоставен дел од моето мени“, вели Марина Т., домаќинка од Скопје.
Слично мислење има и Драган П., пензионер од Битола.
„Кромидот е една од основните намирници за мене и мојата сопруга. Ние го користиме секој ден за салата или за вариво. Немаме голема пензија и не можеме да си дозволиме да плаќаме 100 или 120 денари за килограм. Тоа е премногу за нас“, вели тој.
Властите тврдат дека будно ја следат состојбата на пазарот и дека ќе преземат мерки за заштита на интересите на домашните производители и потрошувачи.
Тие апелираат до граѓаните да купуваат кромид од македонско потекло и да го поддржат локалното земјоделство.
Колку за потсетување овој зеленчук во 2020 и во 2021 година просечно се продаваше по цена од речиси 18 денари за килограм.
Б.З.М.
