Во последните три децении за речиси 80 проценти е зголемен бројот на лица помлади од 50 години што се заболени од рак, покажуваат резултатите од најголемата студија, која се занимава на оваа тема. Глобалниот број на заболени од рак се зголеми од 1,82 милион во 1990 година на 3,26 милиони во 2019 година, а смртните случаи од рак кај луѓето под 50-годишна возраст се зголемија 27 %.
Истражувањата покажаа дека повеќе од еден милион луѓе помлади од 50 години годишно умираат од рак. Експертите засега не може со сигурност да кажат што се крие зад големиот пораст на заболени од рак, но сметаат дека лошата исхрана, употребата на алкохол и тутун, слабата физичка активност и дебелината се меѓу причините.
„Од 1990 година инциденцијата и смртноста на раните форми на рак значително се зголемија на глобално ниво. Поттикнувањето здрав начин на живеење, кој вклучува намалена потрошувачка на тутун и алкохол, здрава исхрана и соодветни активности на отворено, може да го намали ризикот од такви болести “, велат научниците во истражувањето, како што пренесува „Гардијан“.
Претходните студии покажаа дека во последните неколку децении, во разни делови на светот, инциденцијата на рак кај луѓето помлади од 50 години се зголемува. Но, најновото истражување, спроведено од Универзитетот во Единбург во Шкотска и Медицинскиот факултет при Универзитетот „Жеџијанг“ во Кина е прво од ваков вид што го испитува проблемот на глобално ниво и ги истражува факторите на ризик за помладите возрасни лица.
Повеќето претходни студии се фокусираа на регионалните и националните разлики. Во оваа глобална студија научниците анализираа податоци од 204 земји кои покриваат 29 видови на рак. Тие ги разгледаа новите случаи, смртните случаи, здравствените исходи и факторите на ризик за луѓето на возраст од 14 до 49 години за да проценат како се променила ситуацијата помеѓу 1990 и 2019 година.
Во 2019 година имаше 3,26 милиони нови дијагнози на рак кај оние под 50 години, што е 79 % зголемување од 1990 година. Ракот на дојката доминира во најголем број случаи. Помеѓу 1990 и 2019 година најбргу се зголемил бројот на случаи на ран почеток на рак на душникот и на простатата.
Во 2019 година 1,06 милион луѓе на возраст под 50 години починале од рак, што е зголемување за 27 % во однос на бројката од 1990 година. По ракот на дојката, најголем број смртни случаи се поврзани со рак на душникот, белите дробови, желудникот и цревата. Најголем пораст на смртните случаи има кај луѓето со рак на бубрезите или јајчниците.
