Украинскиот претседател Володимир Зеленски вчера ја осуди, како што рече, системската корупција во медицинските ослободувања за луѓето кои избегнуваат регрутирање, велејќи дека системот е отворен за поткуп и масовни заминувања во странство.
Украина го постави сузбивањето на корупцијата како приоритет, бидејќи ја продолжува својата контраофанзива 18 месеци по руската инвазија. Исто така, искоренувањето на корупцијата е клучен елемент во напорите на земјата да се приклучи на Европската унија.
Во своето видео обраќање во текот на ноќта, Зеленски рече дека Советот за национална безбедност и одбрана ги прегледал податоците што го покажуваат степенот на лажни ослободувања од воена служба, поткуп и бегство во странство од инвазијата во февруари 2022 година. Тој исто така рече дека истрагата за сомнителните медицински изземања сè уште е во тек.
„Има примери на региони каде бројот на ослободувања од воена служба поради одлуките на медицинските комисии е десеткратно зголемен од февруари минатата година“, рече тој. „Апсолутно е јасно за какви одлуки станува збор. Коруптивни одлуки“, предупреди тој.
Зеленски изјави дека истрагата открила коруптивни практики во различни региони и од функционери на различни позиции, вклучително и поткуп од 3.000 до 15.000 долари. Тој рече и дека е потребна посебна анализа за да се утврди бројот на лица кои избегале во странство, главно врз основа на одлуките на лекарската комисија.
„Зборуваме за најмалку илјадници поединци“, предупреди тој. Овој месец Зеленски ги разреши сите шефови на регионалните воени центри на Украина за регрутирање. Тој, исто така, рече дека се отворени повеќе од сто кривични случаи во широката истрага започната по корупцискиот скандал во канцеларијата за вработување во јужниот дел на Одеса минатиот месец.
