Заработката на „Nestle SA“ се зголеми откако најголемата светска компанија за храна ги зголеми цените на храната за домашни миленици „Purina“ и чоколадните шипки „KitKat“, објави „Bloomberg“.
Приходите се зголемија за 8,7% на органска основа во првата половина, објави компанијата денеска, а пак аналитичарите очекуваа раст од 8,4%.
„Nestle“, исто така, го подигна долниот дел од прогнозниот опсег за раст на продажбата за цела година.
Како и многу други компании за стока за широка потрошувачка, швајцарскиот производител на „Nespresso“ и „Perrier“ ги зголеми приходите со зголемување на цените на своите производи во последните квартали, иако обемот на продажба се намали. Со забавување на инфлацијата на цените на суровините, компаниите бараат начини да го зголемат уделот на пазарот и да ги поттикнат потрошувачите да трошат, иако буџетите остануваат тесни.
Четвртиот квартал по ред, обемот на продажбата се намали бидејќи некои купувачи се воздржаа поради повисоките цени и купија помалку брендирани производи.
Извршниот директор на „Nestle“, Марк Шнајдер, изрази уверување дека обемот и мешавината на продадени производи ќе се подобрат во остатокот од годината бидејќи ќе ги зголеми трошоците за маркетинг.
Продажбата се очекува да порасне од 7% до 8% оваа година, прогнозира „Nestle“. Претходно, долната граница на овој опсег беше 6%. Аналитичарите предвидуваа раст од 7,6% за 2023-та година.
„Секогаш оставате одредена заштита од негативни влијанија и лично очекувам органскиот раст да биде повеќе во опсег од 7,5-8%“, изјави извршниот директор Марк Шнајдер за новинарите.
Компанијата се бори поради ограничувањата на капацитетот во САД, што најмногу влијае на производите како што се „Purina“, кремите за кафе и флашираната вода „Perrier“.
„Бруто маржата, мерка за профитабилност, треба да се прошири во втората половина по падот во првите шест месеци од годината“, се вели во соопштението на Шнајдер.
„Nestle“, исто така, рече дека стратешкиот преглед на „Palforzia“, лек за алергија на кикиритки, напредува и се разгледуваат неколку опции. Компанијата планираше да го заврши прегледот во првата половина на 2023-та година.
Шнајдер го купи производителот „Palforzia“ со договор од 2,6 милијарди долари во 2020-та година, што беше еден од неговите најголеми потези во здравствениот простор од преземањето во 2017-та година. Но, „Nestle“ го отпиша поголемиот дел од вредноста на бизнисот откако не се покажа добро.
