Паметните очила на „Ray-Ban“, кои компанијата ги лансираше со „Meta“ пред речиси две години, не успеаја да ги освојат срцата на потрошувачите, од кои многумина се чини дека ретко ги користат, според внатрешните податоци на технолошкиот гигант, цитирани од „Wall Street Journal“.
Помалку од 10 проценти од „Ray-Ban Stories“ купени од лансирањето на производот во септември 2021-ва година, активно се користат од страна на потрошувачите, откри февруарскиот документ на компанијата што го видоа медиумите.
„Meta“ продаде вкупно 300.000 единици од уредот до февруари, но компанијата имаше само 27.000 месечни активни корисници.
Уредот, кој е важен дел од хардверската стратегија на „Meta“, им овозможува на корисниците да фотографираат и да слушаат музика од рамките на очилата, со додадени голем број други функции.
Меѓу главните причини за лошите перформанси на очилата кај корисниците се проблемите со поврзувањето, со некои хардверски функции, вклучително и траењето на батеријата, со звукот и со гласовните команди, открива документот.
„Покрај тоа, треба подобро да разбереме зошто корисниците престануваат да ги користат очилата, како да се осигураме дека ја поттикнуваме употребата на нови функции и генерално како да ги задржиме корисниците и да ги задржиме ангажирани“, се додава во текстот.
Портпаролот на „Meta“ одби да коментира за ова прашање.
И покрај слабите перформанси, „Meta“ се надева дека ќе објави втора генерација на „Ray-Ban Stories“ наесен (навреме за празничната сезона) или следната пролет, велат извори запознаени со ова прашање.
Паметните очила се развиени во партнерство со „EssilorLuxottica“, која произведува и продава различни очила, вклучувајќи брендови како што се „Ray-Ban“ и „Oakley“.
