Француско-холандската авијациска групација „Air France-KLM“ објави профит во вториот квартал кој ги надмина пазарните проценки во услови на силна побарувачка за летови, за која компанијата рече дека не покажува знаци на забавување.
Оперативниот профит на „Air France-KLM“ се зголеми за 90% на годишно ниво, на 733 милиони евра, надминувајќи ја проценката на аналитичарите од 649 милиони евра, бидејќи бројот на патници се зголеми заедно со повисокиот фактор на оптоварување. Во меѓувреме, приходите се зголемени за 14 отсто на 7,6 милијарди евра, а овој показател ги надмина и пазарните очекувања.
Групата рече дека темпото на резервации останало стабилно, дури и за евтината единица „Transavia“, која беше потресена во последните месеци од штрајкови на францускиот персонал и недостиг на машини во Холандија.
„Air France-KLM“ не е единствената авиокомпанија што има корист од големата побарувачка за воздушен транспорт, што помогна да се зајакнат билансите по подолг период на ограничувања за патувања за време на пандемијата на коронавирусот. Минатата недела, „EasyJet Plc“ рече дека продолжува да известува за силен импулс во зимските резервации, додека американските авиопревозници имаат корист од порастот на летовите во странство.
Сепак, расте загриженоста за долгорочната одржливост на побарувачката бидејќи потрошувачите се соочуваат со забрзана инфлација и зголемени трошоци за хипотека.
„Ryanair Holdings Plc“ ја намали прогнозата за сообраќајот за целата година и рече дека ќе размисли за намалување на цените на билетите за да се одржи зимската побарувачка бидејќи патниците стануваат почувствителни на трошоците.
„Air France-KLM“ очекува да работи со 95% капацитет оваа година во споредба со нивоата од 2019-та година и дополнително да се опорави на нивоата пред пандемијата во 2024-та година.
Во холандската „KLM“, операциите се стабилизираа и покрај прекините во синџирите на снабдување, тесниот пазар на труд и проблемите со достапноста на машините.
Компанијата исто така соопшти дека стапила во ексклузивни разговори со „Apollo Global Management“ за потенцијално финансирање од 1,5 милијарди евра за нејзината програма за лојалност.
