Најголемиот светски производител на цемент „Holcim“ во четвртокот изјави дека очекува побарувачката за градежни материјали да остане силна во оваа година, откако објави подобра од очекуваната продажба и заработка.
Швајцарската компанија, која се гледа како показател за развојот во поширокиот градежен сектор, ги намали стравувањата од забавување поврзано со зголемувањето на каматните стапки на глобално ниво.
Федералните резерви на САД ги зголемија клучните каматни стапки за четвртина процентен поен во средата, наведувајќи ја повисоката инфлација како причина за највисокото зголемување на стапките на американската централна банка во последните 16 години.
И другите централни банки ги зголемуваат каматните стапки, додека се стравува дека бавниот економски раст во Кина ќе влијае на глобалната економија.
Сепак, „Holcim“ претстави сигурни изгледи за остатокот од годината бидејќи продолжува да го префрла својот фокус на Северна Америка и Европа, подалеку од Азија.
„Компанијата очекува побарувачката на сите нејзини пазари да остане стабилна и да продолжи со профитабилен раст“, соопштија од „Holcim“.
Компанијата, која произведува малтер и материјали за покриви покрај цементот, соопшти дека продажбата паднала за 10,9 отсто на 7,34 милијарди швајцарски франци (8,53 милијарди долари) во трите месеци до 30-ти јуни на годишна основа.
Голем дел од падот беше очекуван бидејќи ја одразуваше продажбата на индискиот бизнис на „Holcim“ во минатата година, како и неповолните движења на валутата, вклучително и посилниот швајцарски франк.
Просечната прогноза на аналитичарите составена од компанијата предвидуваше продажба од 7,23 милијарди франци. На органска основа, без влијанието на валутните промени и продажбата на средства, продажбата на групата градежни материјали се зголеми за 7% во кварталот на годишно ниво.
Повторливиот оперативен профит на „Holcim“ падна за 0,6 отсто на 1,55 милијарди франци, надминувајќи ги очекувањата на аналитичарите од 1,45 милијарди франци. На органска основа е зголемен за 14% во однос на истиот период лани.
Компанијата ја потврди својата прогноза за цела година, сè уште со цел за повеќе од 6% органски раст на продажбата.
