Макпетрол АД Скопје оствари 5 милиони евра добивка за периодот јануари-јуни 2023

Во текот на првата половина од 2023 година, опкружувањето во кое работеше Друштвото сеуште беше нарушено и тоа во најголем дел поради воениот конфликт помеѓу Русија и Украина, кој има силно влијание на цените на енергенсите на светските берзи. Цените на енергенсите на светските берзи во текот на полугодието делумно се стабилизираа, односно се намалуваа, а се со тенденција на достигнување на предвоените нивоа. Намалувањето на цените на енергенсите, позитивно влијаеше на увезената инфлација, која постепено се намалува, иако не со посакуваниот интензитет. Дополнително, со цел намалување и контрола на домашната инфлација која на крајот на 2022 година беше двоцифрена, Народната Банка на Република Северна Македонија, во текот на првите шест месеци од 2023 година презема монетарни мерки и во повеќе наврати ги зголеми референтните каматни стапки.

Продолжувањето на воениот конфликт, намалувањето на цените на енергенсите, монетарните мерки и високата инфлација, неминовно влијаеа и врз работењето на „Макпетрол“ АД. Но, како резултат на посветеноста и ангажираноста на Раководството, во текот на првата половина од 2023 година Друштвото обезбеди непрекинато снабдување со нафтени деривати и природен гас, иако се справуваше со локална и светска неизвесност.

И покрај сите предизвици, во текот на првата половина на 2023 година, „Макпетрол“ АД оствари позитивни резултати кои ги надминаа планираните, иако приходите и добивката забележаа пад.

Во текот на 2023 година, „Макпетрол“ АД Скопје оствари вкупен приход во износ од 13,87 милијарди денари, кој е помал од минатогодишниот за 2,46 милијарди денари, односно остварен е пад од 15,06%.

На квартално ниво, вкупните приходи во 2023 година како што се прикажани долу се намалуваат, во најголем дел поради намалувањето на цените на нафтените деривати.

Вкупните расходи остварени во 2023 година се во висина од 13,53 милијарди денари што претставува намалување во однос на минатата година за 2,21 милијарди денари или за 14,05%.

Како резултат на остварените приходи и расходи, на крајот на периодот, Друштвото оствари
позитивни финансиски резултати искажани преку добивка пред оданочување во износ од 339
милиони денари која е помала за 42% од остварената добивка за шесте месеци минатата година
кога изнесуваше 585 милиони денари.

Целосното образложение за финансискиот резултат можете да го погледнете тука.