Холандската здравствена технолошка компанија „Philips“ незначително ги подигна своите цели за годината, откако објави повисок од очекуваниот пораст на основната добивка за вториот квартал, благодарение на подобрите синџири на снабдување, силните нарачки и мерките за ефикасност.
Групацијата со седиште во Амстердам, поранешен индустриски конгломерат кој сега се фокусира на медицинската технологија, објави прилагодена заработка пред камата, данок и амортизација (EBITA) од 453 милиони евра во периодот април-јуни, надминувајќи ги очекувањата од 394 милиони евра.
За целата година, таа очекува среден едноцифрен раст на споредливите приходи од продажба, додека претходната прогноза беше за ниско едноцифрен раст.
Прилагодената „EBITA“ маржа сега се очекува да биде на горниот крај од претходно прогнозираниот висок едноцифрен опсег.
„Philips“, кој се соочи со тужби за повлекување на своите респиратори, рече дека произвел 99 отсто од новите уреди и алатки за поправка на неисправните.
Групата ги доживува последиците од повлекувањето на милиони респиратори користени за лекување на апнеја при спиење од глобалниот пазар од јуни 2021-ва година.
Компанијата вели дека ова останува нејзин главен приоритет.
„Поголемиот дел од уредите за терапија за спиење веќе се кај пациенти и даватели на домашна нега, а ние сме целосно фокусирани на обновување на погодените респиратори“, рече извршниот директор Рој Џејкобс.
„Philips“, исто така, рече дека судскиот спор и истрагата на Министерството за правда на САД се во тек.
