Аквизицијата на „Amazon“ за 1,7 милијарди долари на производителот на роботски правосмукалки „iRobot“ може да ја намали конкуренцијата и да ја зајакне позицијата на „Amazon“ како онлајн пазар, предупредија во четвртокот европските антимонополски регулатори.
Европската комисија започна целосна истрага и до 15-ти ноември ќе одлучи дали да го одобри договорот или да го блокира.
Антимонополските власти ширум светот ја засилија контролата врз големите технолошки компании кои купуваат помали ривали, загрижени за собирањето податоци од само неколку компании и големи играчи кои ја искористуваат нивната доминантна улога на новите пазари.
Аквизицијата, објавена минатиот август, ќе го додаде роботот „Roomba“ на „iRobot“ во портфолиото на паметни уреди на „Amazon“, кое вклучува гласовен асистент „Alexa“, паметни термостати, безбедносни уреди и паметни ѕидни дисплеи.
„iRobot“ ја создаде својата прва правосмукалка „Roomba“ во 2002-ра година. Претходно, „Amazon“ рече дека пазарот на правосмукалки е многу конкурентен, со многу кинески играчи.
„Комисијата е загрижена дека договорот ќе му овозможи на „Amazon“ да ја ограничи конкуренцијата на пазарот на правосмукалки и да ја зајакне својата позиција како онлајн пазар“, соопшти ЕК.
„Комисијата тесно соработуваше со другите органи за конкуренција за време на првичната истрага и ќе ја продолжи оваа соработка во контекст на длабинска истрага. Отворањето на длабинска истрага не го прејудицира нејзиниот исход“, додаде ЕК.
Одлуката на чуварот на конкуренцијата ги потврди тврдењата на „Reuters“ минатиот месец и доаѓа еден месец откако британската антимонополска агенција безусловно го расчисти договорот по прелиминарниот преглед.
