Забавување на економијата во еврозоната

Економската активност во еврозоната за малку ќе запреше во јуни, сигнализирајќи го крајот на закрепнувањето што следеше по зимскиот пад. Индексот на менаџери за набавки(PMI) според пресметките на S&P падна на петмесечен минимум од 50,3 од 52,5 во мај. Франција погодена од штрајкови, како и Германија, чии фабрики го намалија производството, придонесоа за падот.

Еврото ослабе за 0,8 отсто на 1,0874 долари, додека приносот на двегодишните германски обврзници падна за 13 базични поени на 3,1 отсто. Пазарите на пари ги омекнаа облозите за зголемување на каматните стапки, поради што стапката на депозитите достигна нешто помалку од четири отсто, пренесува Блумберг.

Иако еврозоната направи доволно за да излезе од благата рецесија што ја претрпе меѓу октомври и март, S&P предупреди дека изгледите за продолжување на контракцијата во следниот квартал се зголемија бидејќи Европската централна банка продолжува да ги зголемува каматните стапки.

Аналитичарите оценуваат дека трендот на намалување на композитниот PMI укажува на тешка втора половина од годината, бидејќи компаниите во сите сектори се соочуваат со намалување на нарачките. Производството остана „главната област на слабост“ во јуни, иако проширувањето на услужниот сектор „нагло се забави“.