Малата подморница „Титан“ која со пет лица вчера тргна за да го видат потонатиот брод „Титаник“ на дното на Атлантскиот океан, еден час и 45 минути по нуркањето изгубила контакт со матичниот брод „Полар принц“.
Оттогаш, потрагата по исчезнатата подморница е во тек.
Бостонската крајбрежна стража, која ја предводи операцијата за пребарување, на Твитер објави дека подморницата Титан влегла во океанот, а екипажот на Полар принц изгубил контакт со нив околу еден час и 45 минути по нивното потопување.
Спасувачите веруваат дека подморницата во тоа време била на приближно 1.450 километри од брегот на Кејп Код.
Како што пишува Би-Би-Си, контраадмиралот на американската крајбрежна стража Џон Могер вчера изјавил дека е голем предизвик да се изврши пребарување во толку оддалечена област.
Според Могер, потрагата се врши во два дела. Станува збор за површинско пребарување, во случај Титан да се вратил на површината на океанот, но некако да ја изгубил комуникацијата, а вториот тип на пребарување на кој прибегнале е потрагата по подводни сонари.
Што се однесува до површинската потрага, крајбрежната стража испрати два авиони Ц-130 Херкулес да ја бараат подморницата на површината на водата, на кои им се придружија канадски Ц-130 и авион П8 опремени со подводен сонар.
Могер рече дека ќе им треба дополнителна експертиза за да ја спасат подморницата доколку ја најдат под вода и ќе побараат помош, вклучително и од американската морнарица.
Horizon Maritime, кој е косопственик на Polar Prince, потврди за Би-Би-Си дека и другиот брод на компанијата, Horizon Arctic, исто така бил испратен на локацијата за да помогне во потрагата.
Што е подморницата „Титан“?
Исчезнатата подморница претставува дел од туристичката обиколка на потонатиот брод Титаник, која трае вкупно осум дена.
Според операторот на турата до потонатиот брод Титаник, OceanGate Expeditions, подводниот брод може да превезе до пет лица, имено пилот, „експерт за содржина“, односно водич и тројца патници кои одат на турнеја како туристи.
Операторот, исто така, наведува дека овој мал брод има систем за одржување на живот кој им овозможува на пет лица да поминат до 96 часа на бродот.
Тој тргнува на патувањето со брод од Сент Џонс, Њуфаундленд. Платената тура трае осум дена, а од брегот до потонатиот брод има 400 наутички милји.
Откако ќе стигнат до зоната над потонатиот брод, туристите се качуваат на малата подморница наречена „Титан“ и одат на дното на океанот.
Подморницата може да нурне до длабочина од 4.000 метри, според туроператорот, како што пренесува АП.
Се сомнева дека меѓу патниците во исчезнатата подморница е и Намиш Хардинг, американски милијардер кој на своите социјални мрежи објави за експедицијата до потонатиот брод Титаник.
