Американскиот производител на мемориски чипови „Micron“ планира да ги продолжи своите активности во Кина, инвестирајќи таму околу 600 милиони долари во следните неколку години.
„Овој инвестициски проект ја демонстрира непоколебливата посветеност на „Micron“ кон бизнисот и тимот во Кина“, рече извршниот директор на „Micron“, Санџај Мехротра, цитиран во неодамнешната порака објавена на „WeChat“.
„Micron“ планира да постави нова производна линија во својата фабрика во кинескиот град Ксиан за производство на мобилни „DRAM“, „NAND“ и „SSD“ производи. Инвестицијата вклучува и купување на опрема за пакување во близина на подружница со седиште во Ксиан на тајванската „Powertech Technology Inc“, која „Micron“ ја изнајмува од 2016-та година во својата фабрика.
Според американскиот производител, инвестицијата ќе отвори дополнителни 500 работни места.
Во мај, кинески регулатор предупреди да не се користат компонентите на „Micron“ поради наводни безбедносни ризици. Производите претставуваат огромни безбедносни ризици за синџирот на снабдување на критичната информациска инфраструктура на Народната Република, вклучувајќи ги телекомуникациските компании и државните банки. Но, дури и гигантот за е-трговија „Alibaba“ е исто така купувач на мемориските чипови. За „Micron“ ова беше сериозен удар. Компанијата со седиште во Ајдахо генерира околу 11% од својот годишен приход во Кина.
Технологијата на чипови е во центарот на зголемените тензии меѓу двете светски сили. Сепак, еден од проблемите се врвните чипови, најновите и најнапредните модели кои се достапни на пазарот. Пекинг инвестира многу во овој бизнис – на крајот на краиштата, чиповите се потребни за војската и вештачката интелигенција. Кина инвестираше многу во развојот на сопствената индустрија за производство на чипови како дел од нејзините напори да ја намали зависноста од странска технологија. Сепак, се верува дека земјата е со години зад западните лидери во дизајнот и производството на модерни чипови. Пекинг е сè уште зависен од Јапонија, САД, Јужна Кореја и Тајван.
Во последниве години, САД воведоа голем број ограничувања со цел да го забават напредокот на Кина во чиповите бидејќи стравуваат дека овие напори ја зајакнуваат воената моќ на земјата.
