Повеќе од 20 лица се повредени во воздушен напад во Днепар во централна Украина во саботата вечерта, меѓу кои и три деца со многу сериозни повреди, соопштија во неделата наутро украинските власти.
Спасувачите во градот Днипро на југоистокот на Украина извлекле голем број повредени од урнатините на станбена зграда по рускиот напад, соопштија украинските власти, а пренесува агенцијата dpa.
Спасувачите се уште трагаат по преживеани.
„Русија уште еднаш покажа дека е терористичка држава. „За жал, има луѓе под урнатините“, рече украинскиот претседател Володимир Зеленски во Киев.
Шефот на државата објави видео на кое се гледа како двокатницата била целосно уништена.
Зеленски изјави дека проектилот го погодил просторот помеѓу две двокатни згради. Не многу пред тоа, во регионот беше прогласена тревога за воздух.
„Русите ќе сносат одговорност за се што направија за нашата земја и народ“, додаде Зеленски.
Претходно во саботата, Зеленски рече дека верува оти земјата е подготвена за долгоочекуваната контраофанзива за ослободување на териториите од руската окупација.
„Според мене, од денеска сме подготвени за тој чекор“, рече тој во интервју за Волстрит журнал, кое американскиот весник го објави и како видео на својата веб-страница.
Зеленски, исто така, рече дека би било добро Украина да има повеќе оружје за офанзивата против руската инвазија, но дека не може да чека со месеци за нејзина испорака.
„Цврсто веруваме дека ќе успееме“, рече тој и додаде: „Не знам колку време ќе потрае“ и дека цената на успехот ќе биде висока.
