Технолошкиот гигант „Dell Technologies“ објави заработка која ги надмина очекувањата на аналитичарите откако продажбата на персонални компјутери на компанијата не се намали колку што се очекуваше во услови на пад на пазарот на персонални компјутери.
Резултатот ја одразува континуираната борба за продажба на компјутери, особено на потрошувачите. Пазарот забележа историски пад на испораките од октомври до март по порастот на набавките за време на пандемијата, објави аналитичката компанија „Gartner“ во април. Ривалот на „Dell“, „HP“, објави полоша продажба од очекуваната претходно оваа недела, иако предвиде закрепнување на компјутерите во втората половина.
„Dell“ даде умерена прогноза за продажба, сугерирајќи дека закрепнувањето може да потрае малку подолго од очекуваното. Приходите ќе бидат помеѓу 20,2 и 21,2 милијарди долари во тековниот период до крајот на август, изјави извршниот потпретседател на „Dell“, Ивон Мекгил, на конференциска врска по резултатите. Аналитичарите во просек очекуваа 21,1 милијарди долари, покажаа податоците собрани од „Bloomberg“.
За фискалната година што завршува јануари 2024-та година, „Dell“ ја задржа својата прогноза за пад на приходите од 15 отсто, што „сугерира враќање на последователниот раст во втората половина од годината“, рече Мекгил, кој ќе стане главен финансиски директор подоцна оваа година.
Во првиот фискален квартал, приходите се намалија за 20% до 20,9 милијарди долари. Падот беше помал од просечните 22% прогнози на аналитичарите. Заработката, без одредени ефекти, беше 1,31 долар по акција, соопшти компанијата. Аналитичарите во просек очекуваа 85 центи по акција.
Продажбата на деловните компјутери се покажа подобро од очекуваното. Сегментот генерира продажба од 9,86 милијарди долари, што е пад од 18%, но над проценката од 9,06 милијарди долари. Продажбата на потрошувачки компјутери падна за 41% на 2,12 милијарди долари во периодот до 5-ти мај, во споредба со просечната прогноза од 2,3 милијарди долари.
„Имавме добри резултати во услови на предизвикувачка економија. Ја задржавме ценовната дисциплина, ги намаливме оперативните трошоци и нашиот синџир на снабдување продолжи да работи добро додека се нормализираше пред конкурентите“, рече главниот извршен директор Чак Витон во изјавата.
Перформансите на „Dell“ може да сугерираат дека продажбата на компанијата „го допре дното и може да започне внимателно закрепнување“, напиша Ву Џин Хо, аналитичар во „Bloomberg Intelligence“.
Продажбата на инфраструктура како што се сервери и дата-центри се намали за 18% на 7,59 милијарди долари, во согласност со проценките. На конференција за клиенти во мај, компанијата со седиште во Раунд Рок, Тексас објави соработка со „Nvidia“ за да се олесни локалната вештачка интелигенција на серверите на „Dell“.
Акциите паднаа за околу 2 отсто во продолженото тргување во петокот, откако се затворија на 45,46 долари во Њујорк. Цената на акциите се зголеми за 13% оваа година.
