Еден човек е уапсен бидејќи ја отворил вратата за итни случаи на летот на Азијана ерлајнс при слетувањето на авионот во Јужна Кореја. Сепак, авионот безбедно слета на меѓународниот аеродром Даегу и никој од 194-те патници не е повреден. Локалните медиуми јавија дека голем број патници имале проблеми со дишењето, пренесува Index.hr.
Новинската агенција Јонхап објави дека маж на околу 30 години бил уапсен по слетувањето. Авионот на летот OZ8124 полета од островот Џеџу во петокот наутро по локално време. Времето на случувањата е нејасно, но вратите на авионот биле отворени при крајот на летот, околу 12:45 часот по локално време, објавија јужнокорејските медиуми.
На социјалните мрежи се проширија видеа кои го покажуваат инцидентот. Локалните медиуми тврдат дека во авионот имало и неколку деца на училишна возраст кои патувале на спортски настан. „Децата се тресеа, плачеа и се плашеа“, изјавил родител на еден ученик за Јонхап. Азијан ерлајнс објави дека полицијата покренала истрага.
