Продажбата на мнозинскиот удел на „Fujitsu“ во нејзината единица за климатизација е во застој додека понудувачите не се договорат за цената, изјавија за „Bloomberg“ извори запознаени со ова прашање.
Зголемувањето на цената на „Fujitsu General“ влијаеше на преговорите за уделот од 42 отсто, додаваат изворите, кои сакаа да останат анонимни бидејќи не се овластени јавно да коментираат за ова прашање.
Акциите на „Fujitsu General“ паднаа за повеќе од 10,3% во Токио откако „Bloomberg News“ ја објави веста. Тоа е најголемиот дневен пад од јануари 2018-та година. Сепак, во текот на изминатите 12 месеци, цената на акцијата се зголеми за 39 отсто, вреднувајќи ја компанијата на околу 353 милијарди јени (2,6 милијарди долари), а акцијата е еднаква на околу 1,1 милијарди долари.
Во оваа фаза не се донесени конечни одлуки и дискусиите можат да продолжат во секое време, велат изворите. „Fujitsu“ сепак може да бара други купувачи за средствата, рече еден од изворите.
Јапонската ИТ фирма е во преговори со потенцијални купувачи, вклучително и приватните акционерски фирми „Bain Capital“ и „KKR & Co.“, како и шведскиот производител „Nibe Industrier“. Во март, „Nibe“ рече дека одлучила да не продолжи со процесот на евалуација на потенцијалното стекнување на целиот или мнозински удел во „Fujitsu General“.
„Точно е дека разгледуваме различни начини да ја максимизираме вредноста како независен бизнис, но ништо не е решено во оваа фаза“, рече претставник на „Fujitsu“, но одби да елаборира. Претставниците на „Bain“, „Fujitsu General“ и „KKR“ одбија да коментираат.
„Fujitsu“, кој во своите најславни денови произведуваше сè, од лаптопи до суперкомпјутери и чипови, мобилни телефони и домашни апарати, ги отфрли повеќето од своите производни линии за да се фокусира на информациските и комуникациските технолошки системи за бизниси. Компанијата се стреми кон брза продажба на целиот свој удел во производителот на климатизери бидејќи се обидува да ги продаде несуштинските операции.
