Мета, која е сопственик на Фејсбук, е казнета со рекордни 1,2 милијарди евра од ирскиот регулатор за податоци поради кршење на правилата на ЕУ за заштита на податоците.
Мета, која планира да поднесе жалба, е казнета поради „продолжување на пренос на лични податоци“ на корисниците од Европската економска област (ЕЕА) во САД, што е прекршување на строгата Општа регулатива за заштита на податоците (GDPR) на ЕУ, според одлуката на комисијата.
Тоа е најголемата казна од Европската Унија изречена на технолошка компанија досега, надминувајќи ја казната од 746 милиони евра изречена на Амазон за обработка на лични податоци со прекршување на GDPR.
Истрагата беше предводена од ирската Комисија за заштита на податоци (DPC), која работи на забрана на правната алатка што ја користи Facebook за пренос на податоците на европските корисници во САД.
ЕУ соопшти дека ирската DPC има еден месец да донесе наредба за блокирање на трансатлантскиот пренос на податоци на Facebook. Европскиот суд на правдата во 2020 година пресуди дека договорот ЕУ-САД за пренос на податоци е неважечки поради загриженоста за надзор.
Кон крајот на минатата година, ирската Комисија за заштита на податоци ја казни Мета со 265 милиони евра поради прекршување на правилата за GDPR.
Таа истрага беше поттикната од извештаите дека податоци за повеќе од 533 милиони корисници се пронајдени на веб-страница за хакирање. Податоците вклучуваат имиња, Фејсбук ID, телефонски броеви, локации, датуми на раѓање и адреси на е-пошта на корисници од повеќе од 100 земји.
Мета претходно се закани дека ќе ги отстрани своите услуги од Европа поради проблеми со податоците.
Во својот годишен извештај до Комисијата за хартии од вредност на САД минатата година, компанијата рече дека доколку не се усвои нова рамка според која би можела да го користи сегашниот модел на договор, можеби ќе треба да ја напушти Европа.
