Кинескиот претседател Кси Џинпинг презентираше голем план за развој на Централна Азија.
Планот оди од изградба на инфраструктура до зајакнување на трговијата, преземајќи нова водечка улога во регионот кој традиционално беше сфера на влијание на Русија, пренесува Индекс.
Кина е подготвена да ги координира развојните стратегии со Казахстан, Киргистан, Таџикистан, Туркменистан и Узбекистан и да ја промовира модернизацијата на сите нив, рече Кси во обраќањето на самитот Кина-Централна Азија во северозападна Кина.
„Овој самит додаде нов поттик за развојот и ревитализацијата на шесте земји и вбризгува силна позитивна енергија во регионалниот мир и стабилност. Заедно, ќе поттикнеме нова парадигма на длабоко комплементарна соработка меѓу двете страни на високо ниво“, рече Кси подоцна на прес-конференција со неговите колеги од Централна Азија.
Со својот ангажман, Кина се постави на чело на трката за политичко влијание и енергетски ресурси во енергетски богатиот регион, каде Русија е преокупирана со војната во Украина, а американското присуство во регионот е намалено.
Петте поранешни советски републики, со мрежа на трговски коридори, нудат на Кина алтернативни патишта за транспорт на гориво, храна и други стоки во случај на прекин. Ветувањата за поддршка и соработка на дводневниот самит ќе дадат контраст на „негативната“ слика за Кина што ќе биде претставена на самитот на претставници на Г7 во Јапонија во петок, оценува Ројтерс.
Поддршката на Кина за Централна Азија, исто така, се чини дека ги балансира американските обвинувања за нејзината принудна дипломатија.
Кси рече дека Кина и земјите од Централна Азија треба да ја продлабочат довербата и да понудат „јасна и силна поддршка“ за основните интереси како што се суверенитетот, независноста, националното достоинство и долгорочниот развој.
Тој не ја спомна Украина, која, како и централноазиските држави, беше дел од Советскиот Сојуз.
„Кина е подготвена да им помогне на земјите од Централна Азија да го подобрат спроведувањето на законот, безбедноста и да изградат одбранбени способности“, рече тој.
