„BT Group“, најголемиот британски провајдер за мобилни и широкопојасен интернет, ќе укине до 55.000 работни места до 2030-та година, вклучително и изведувачи, што е еквивалентно на повеќе од 40% од работната сила на компанијата.
Ова се случува во време кога го завршува распоредувањето на оптичките врски и се прилагодува на новите технологии како што е вештачката интелигенција.
Компанијата работи на план за трансформација за изградба на национална оптичка мрежа под водство на Филип Јансен, како и за воведување мобилни 5G услуги со голема брзина.
Поранешниот државен монопол во четвртокот објави проформа пораст на приходите и основната добивка за прв пат по шест години, а резултатите за годината завршија на крајот на март. Но, трошоците за трансформација на бизнисот и ударот на неговиот слободен готовински тек ја намалија цената на акцијата за 7% во утринското тргување.
Јансен тврди дека по завршувањето на ширењето на оптичките влакна, дигитализирањето на начинот на работа, интегрирањето на вештачката интелигенција и поедноставувањето на структурата, „BT“ ќе се потпре на многу помала работна сила и значително намалени трошоци до крајот на деценијата.
„Новата „BT Group“ ќе биде поедноставен бизнис со посветла иднина“, коментира тој.
Вкупната работна сила на групата ќе падне од 130.000 на меѓу 75.000 и 90.000 до фискалната 2030-та година, се вели во соопштението. Околу 30.000 од сегашните вработени во моментов се изведувачи.
Јансен посочува дека сегашните кратења на работните места ќе се забрзаат по завршувањето на мрежата со оптички влакна и исклучувањето на 3G.
Синдикатот на комуникациските работници (CWU) рече дека намалувањата „не се изненадување“ со оглед на претстојните промени во инфраструктурата и технологијата. Разговорите помеѓу „BT“ и „CWU“ беа неопходни за да се обезбеди непречена транзиција, рече синдикатот, додавајќи дека „BT“ треба да има за цел да ги задржи директните работни места и да се обврзе на отпуштања на надворешниот персонал кој работи на привремени договори.
Ривалот на „BT“, „Vodagfone“, во вторникот објави дека ќе укине 11.000 работни места ширум светот за да се обиде да ја врати конкурентноста.
Јансен тврди дека ќе бидат потребни околу 10.000 мрежни инженери помалку за управување со дигитални мрежи, додека автоматизацијата и вештачката интелигенција би можеле да заменат уште 10.000.
Има „огромни можности“ за користење на вештачката интелигенција, посочува тој, додавајќи дека јазичните модели на генеративната вештачка интелигенција ќе бидат скок напред пропорционален со појавата на паметниот телефон.
„BT“ ќе користи вештачка интелигенција за да понуди подобра услуга за клиентите, како и да ги искористи другите деловни можности.
