Американскиот технолошки концерн „Amazon.com Inc.“ планира да инвестира 12,7 милијарди долари во облак инфраструктура во Индија до 2030-та година, придружувајќи им се на другите светски технолошки гиганти кои се обложуваат на растот на дигиталната економија на оваа јужноазиска земја, пишува „Bloomberg“.
Огранокот за облачни услуги на американската компанија, кој има центри за податоци во регионите Мумбаи и Хајдерабад, веќе има инвестирано 3,7 милијарди долари во Индија од 2016-та до 2022-ра година, се вели во соопштението. Новиот износ ќе вклучува трошоци за изградба, серверски компјутери и телекомуникациска инфраструктура.
Голем број светски технолошки компании, од „Apple Inc.“ до „Netflix Inc.“, се прошируваат во најнаселената земја во светот со услуги како видео стриминг и онлајн малопродажба, а банките на Вол Стрит и глобалните осигурителни компании долго време управуваат со технолошки центри во земјата. Овие претпријатија го забрзуваат растот на индискиот пазар на облачни услуги, кој според истражувачката компанија „IDC“ расте во просек од 23% годишно и ќе достигне 13 милијарди долари во 2026-та година.
За да го зајакне својот бизнис со веб-услуги, „Amazon“ соопшти дека обучил повеќе од 4 милиони луѓе во Индија за вештини за облак од 2017-та година и инвестирал во шест проекти за обновлива енергија во обем на комунални услуги.
„Amazon“ има околу 62.000 вработени во Индија, со околу една третина во Хајдерабад, каде пред неколку години го отвори својот најголем комплекс во светот.
Индија е најновиот пазар со голем раст за онлајн малопродажниот гигант, но „Amazon“ се соочува со сериозна конкуренција од локалните играчи. Основачот на компанијата, Џеф Безос, лично ја посети земјата неколку пати во последните години. „Amazon“ ги започна своите операции во Индија во 2004-та година од Хајдерабад, но малопродажбата на концернот започна дури во 2013-та година.
