Европската централна банка денеска одлучи да ги зголеми трите клучни каматни стапки за по 25 базични поени, по шесте зголемувања од по 50 или 75 базични поени. На тој начин практично тргна по патот на американската централна банка која исто така вчера го забави темпото и одлучи да ги зголеми каматните стапки за 0,25 отсто.
„Изгледите за инфлација остануваат премногу високи предолго. Дојдовните информации во голема мера ја поддржуваат оценката за среднорочната перспектива за инфлацијата што Управниот совет ја формираше на претходната седница. Вкупната инфлација се намали во последните месеци, но основните ценовни притисоци остануваат силни. Во исто време, минатите зголемувања на каматните стапки силно се пренесуваат на финансирањето и монетарните услови на еврозоната, додека заостанувањето и силата на преносот кон реалната економија остануваат неизвесни“, се вели во соопштението на ЕЦБ.
По денешното зголемување на каматната стапка на главните операции за рефинансирање, каматните стапки на маргиналната кредитна линија и на депозитната линија од 10 мај ќе се зголемат на 3,75 отсто, четири и 3,25 отсто, соодветно, соопшти ЕЦБ.
Идните одлуки на Управниот совет ќе гарантираат дека стапките на политиката ќе се доведат до нивоа што се доволно рестриктивни за да се постигне навремено враќање на инфлацијата до среднорочната цел од два проценти и ќе се одржуваат на тие нивоа онолку долго колку што е потребно. Советот ќе продолжи да следи пристап заснован на податоци при утврдување на соодветното ниво и времетраење на ограничувањата, се вели во соопштението.
Конкретно, одлуките за референтната стапка на Управниот совет ќе продолжат да се засноваат на проценката на изгледите за инфлацијата во светлината на дојдовните економски и финансиски податоци, динамиката на раст на цените и силата на преносот на монетарната политика.
Клучните каматни стапки на ЕЦБ остануваат примарна алатка на Управниот совет за одредување на ставот на монетарната политика. Паралелно, ќе продолжи да го намалува портфолиото на програмата за купување средства на Евросистем (APP) со измерено и предвидливо темпо. Во согласност со овие принципи, Управниот совет очекува да престане со реинвестирањето од јули 2023 година.
