„Robert Bosch GmbH“ го презема американскиот производител на чипови „TSI Semiconductors“ и планира да инвестира повеќе од 1,5 милијарди долари во неговата фабрика во Калифорнија, зајакнувајќи и проширувајќи го глобалниот облог на германската компанија за чипови, пишува „Bloomberg“.
Најголемиот светски снабдувач на автоделови планира да ја уреди и модернизира фабриката на „TSI“ во Розевил со цел да започне со производство на силициум карбид чипови таму од 2026-та година. Компанијата очекува 30% годишен раст на побарувачката за овој тип на чипови, кои често се користат во управувањето со енергијата, што е од корист за електричните автомобили.
„Влегуваме на пазар кој се развива многу брзо“, изјави извршниот директор Стефан Хартунг во интервју за „Bloomberg“. „Новите платформи за електрични возила, без разлика каде се направени во светот, а се потпираат првенствено на технологијата на силициум карбид“, посочува тој.
Финансиските услови на зделката не беа обелоденети освен планираната инвестиција во фабриката, која исто така е предмет на регулаторно одобрување. „Bosch“ истакнува дека целосниот опсег на идните трошоци ќе зависи од можностите за федерално финансирање.
Инвестицијата на „Bosch“ следи по повиците на американската влада и усвојувањето на законодавството од Конгресот за зајакнување на домашното производство на чипови како дел од напорите за зајакнување на економската и националната безбедност. Купувањето на „TSI“ претставува „трет столб“ за полупроводничкиот бизнис на „Bosch“ по одлуките за изградба и проширување на две локации во Германија, во Дрезден и Ројтлинген.
„Оваа инвестиција од 1,5 милијарди долари ќе ги намали трошоците, ќе го зајакне нашиот синџир за снабдување со електрични возила, ќе помогне во обновувањето на американското производство и ќе создаде економски можности“, рече американскиот потпретседател Камала Харис во посебна изјава на оваа тема.
„ZF Friedrichshafen AG“, еден од главните ривали на „Bosch“, направи сличен потег кога станува збор за чиповите од силициум карбид, инвестирајќи 3 милијарди долари со американскиот концерн „Wolfspeed Inc.“ во германска фабрика за производство на чипови за електрични автомобили.
Силициум карбид нуди предности бидејќи е енергетски поефикасен материјал и врши подобра работа како енергетски конвертор од другите полупроводнички композиции. Кај батериите за електрични возила што користат силициум карбид, на пример, времето на полнење може значително да се намали и да се зголеми опсегот.
