Visa со подобри резултати од очекувањата на аналитичарите

Компанијата за картички Visa објави скок на нето добивката од 17 отсто во првите три месеци од оваа година, поддржана од силната потрошувачка на корисниците на картички. Резултатите се подобри од очекувањата на аналитичарите.

Нејзината нето добивка на тој начин достигна 4,3 милијарди долари во фискалниот втор квартал, што е зголемување од 17 отсто во споредба со истиот период лани.

Вкупните приходи во исто време достигнаа осум милијарди долари и се за 11 отсто повисоки во однос на истиот период лани, покажуваат кварталните оперативни резултати.

Трошењето на клиентите беше отпорно и покрај високата инфлација и загриженоста за економската ситуација, така што обемот на плаќања се зголеми за 10 проценти во кварталот што заврши на 31 март.