Јужнокорејскиот производител на батерии „LG Energy Solution Ltd.“ е убеден дека ќе ја достигне целта за раст на продажбата од 30% во оваа година, поттикната од силната побарувачка за електрични возила и федералните стимулации вклучени во американскиот Закон за намалување на инфлацијата (IRA), пишува „Bloomberg“.
„Побарувачката за електрични автомобили во Северна Америка останува многу силна“, рече главниот финансиски директор Ли Џонг-сил.
Компанијата објави нето добивка за првиот квартал од 500,6 милијарди вони (374 милиони долари), надминувајќи ги пазарните проценки.
„Иако побарувачката во Европа изгледа ограничена и цените на металите паѓаат, ние сме повеќе од уверени дека можеме да ја постигнеме првичната цел од 30% раст на продажбата за 2023-та година“, додаде Ли.
По објавувањето на извештајот, акциите на „LG Energy“ пораснаа за 2,4%, а од почетокот на годината нивната вредност е зголемена за близу 30 проценти.
Компанијата очекува да се квалификува за федералните стимулации на „IRA“ за изградба помеѓу 15 и 20 гигават часови (GWh) производен капацитет во оваа година.
„LG Energy“, која испорачува батерии на „Tesla Inc.“, „General Motors Co.“ и „Ford Motor Co.“, на крајот сака да има околу 250 GWh производствен капацитет во САД и да развие цилиндрични батерии и системи за складирање енергија базирани на раствори на литиум-железо-фосфат.
Во меѓувреме, „LG Energy“ бара да обезбеди минерали од батериите за да се усогласи со Европскиот закон за суровини, кој, како и „IRA“, има за цел да ја намали зависноста на регионот од кинеските залихи.
Набргу по објавувањето на финансиските податоци на компанијата, менаџментот соопшти дека потпишал договор вреден 23 милијарди долари со „Posco Future M Co.“ за набавка на катодни материјали со висока содржина на никел.
„Продажбата во Северна Америка ќе скокне оваа година, а производството ќе се зголеми со помош на фабрика за заедничко вложување со „GM“, додека американскиот производител на автомобили го зголемува производството на електрични возила“, велат аналитичарите од „Shinhan Investment Corp.“ во белешка до клиентите.
Даночните олеснувања вградени во „IRA“ ќе се зголемуваат секоја година како што се зголемува производствениот капацитет на САД, додаваат експертите.
„Иако цените на металите на батериите паднаа во првиот квартал, особено на литиумот во Кина, што изврши надолен притисок врз цените на батериите, падот нема да и наштети на профитабилноста“, истакна Ли од „LG Energy“.
„За среќа, потпишавме договори со производителите на автомобили на пловечка основа“, додава тој.
„LG Energy“ ги тестира таканаречените 4.680 цилиндрични батериски ќелии што ги користи „Tesla“ во фабрика во Јужна Кореја и планира да започне со масовно производство до крајот на оваа година.
Компанијата исто така размислува за развој на литиум-железо-фосфатни ќелии за електрични возила, пазар на кој доминираат кинески компании. Ќелиите на база на железо се поевтини од батериите на база на никел на кои „LG“ се фокусираше досега.
Јужнокорејската компанија е уверена дека ќе ги победи своите кинески ривали, барем во САД.
„Нема да биде лесно за кинеските компании да влезат во САД“, рече Ли, додавајќи: „Тоа не е само прашање на инвестиции. Ви треба многу искуство за да изградите синџири на снабдување и да управувате со фабрики. Потребно е многу време“.
