Њујоршките берзански индекси благо ја загубија вредноста во текот на изминатата недела.
Иако во САД се повеќе се зборува за голема веројатност за рецесија, априлските податоци за производствената активност велат поинаку. Индексот PMI се искачи на 53,5 поени, што е највисоко од мај минатата година.
Сепак, на развиените берзи растот во последните денови запре. Dow Jones, откако претходно порасна четири пати по ред на неделно ниво, загуби 0,23 отсто за пет дена. Кварталните деловни резултати засега се генерално (во три четвртини од случаите) подобри од очекуваните.
Исклучок е Тесла (производителот на електрични возила во првиот квартал работеше со четвртина помала добивка, но со поголеми приходи), чии акции во четвртокот паднаа за десет отсто. Засега, сепак, се смета дека водечките корпорации добро се адаптирале на повисоките каматни стапки, а главното прашање е колку долго ќе трае и што друго би можел да „зготви ФЕД“. Се очекува да ја зголеми каматната стапка за уште 25 базични поени (на 5,0-5,25 проценти) на состанокот во мај и со тоа да го заврши циклусот на затегнување на монетарната политика.
Како што е познато, брзиот раст на каматните стапки е причина за турбуленциите на банкарскиот пазар што се случија во март. Шорт продавачите сакаа да го искористат ова, но не успеаја. Во април тие веќе загубија милијарда долари од европските банкарски акции, според аналитичката компанија Ортекс. Станува збор за шпекуланти кои се обложуваат со кратки позиции дека акциите на финансиските институции (БНП, Сантандер, АБН…) дополнително ќе паднат, но тоа не им се исплатеше, бидејќи паниката брзо стивна.
Имено, наскоро следеа изненадувачки добри квартални деловни резултати на банките од Волстрит. Индексот на европските банки (STOXX European banks share index) отскокна речиси 20 отсто од дното во март, вредноста на акциите на италијанската банка UniCredit (тука беа отворени многу кратки позиции) дури порасна за 35 отсто и достигна највисока вредност од 2016. Според некои предвидувања, добивката на европските банки во првиот квартал (главно поради повисоките каматни маржи) би требало да порасне за повеќе од 30 отсто.
