„International Business Machines“ предвидува годишен приход што ќе ги исполни очекувањата на аналитичарите, давајќи внимателен оптимистички сигнал за трошењето на технологијата во неизвесна економија.
Приходите од продажба ќе се зголемат меѓу 3 и 5 отсто во 2023-та година, соопшти технолошкиот гигант. Компанијата ја потврди претходната прогноза за годишен слободен готовински тек од 10,5 милијарди долари.
Приходите на „IBM“ во првиот квартал достигнаа 14,3 милијарди долари, непроменети во однос на истиот период од претходната година, но малку под просечните прогнози на аналитичарите. Со исклучок на одредени ставки, заработката достигна 1,36 долари по акција за кварталот до 31-ви март. Аналитичарите анкетирани од „Bloomberg“ прогнозираа 1,25 долари заработка по акција.
„Гледаме одредено омекнување на крајот од првото полувреме. Мислам дека растот малку ќе се засили кон крајот на годината“, рече главниот извршен директор Арвинд Кришна.
Акциите на „IBM“ пораснаа за околу 1,6% во тргувањето по завршувањето на њујоршката сесија на 126,32 долари. Акцијата е намалена за 10 проценти од почетокот на годината до среда.
Резултатите на „IBM“ сугерираат дека големото портфолио на софтверски производи и услуги на компанијата и помага да неутрализира дел од падот во целокупната економија, напиша аналитичарот на „Bloomberg Intelligence“, Анураг Рана.
Кришна работи на преместување на компанијата во услуги со повисока маржа како хибридни облаци. Во кварталот, приходите од продажба на софтвер се зголемија за 2,6% на 5,9 милијарди долари, иако растот во единицата „Red Hat“ беше 8%, што е најмал пораст откако бизнисот беше купен од „IBM“ во 2019-та година за околу 33 милијарди долари. Според Кришна, новиот нормален опсег за „Red Hat“ е 11-13% раст.
Приходите од советодавниот бизнис се зголемија за 2,8 отсто на 5 милијарди долари, но темпото на тие зделки забави во регионот на Америка, што може да се пренесе на друго место, рече Кришна. Според него, клиентите сѐ уште не се откажуваат од проектите, само ги одложуваат.
„IBM“ ја надмина својата прогноза за профит, делумно поради успешното управување со трошоците и мерките за продуктивност што ги таргетираше претходно оваа година, објави Кришна. Кога ќе завршат, рече тој, кратењето на работните места може да биде околу 5.000, наместо претходно најавените 3.900. Сепак, „IBM“ вработи 7.000 луѓе само во првиот квартал.
Новите мерки за продуктивност и ефикасност се очекува да придонесат за заштеда од 2 милијарди долари годишно до крајот на 2024-та година, изјави главниот финансиски директор Џејмс Кавано по објавувањето на финансискиот извештај.
Поделбата на некои од бизнисите е во срцето на планот за трансформација на „IBM“, вклучувајќи го и неодамнешниот спин-оф на „Kyndryl Holdings“ и дел од бизнисот „Watson Health“. Технолошкиот гигант сега размислува да продаде уште една единица за следење на времето.
Во меѓувреме, „Global Foundries“, која го купи бизнисот со чипови на „IBM“ во 2015-та година, поднесе тужба обвинувајќи ја компанијата дека продолжува да ја монетизира интелектуалната сопственост од таа деловна единица дури и по финализирањето на договорот.
