Кина ќе биде најголемиот придонесувач за глобалниот раст во следните пет години, со нејзиниот удел двојно поголем од оној на САД, според Меѓународниот монетарен фонд, пишува „Bloomberg“.
Уделот на азиската земја во глобалниот раст на бруто-домашниот производ се очекува да достигне 22,6 отсто од вкупниот светски раст до 2028-ма година, според пресметките на „Bloomberg“ врз основа на податоците објавени минатата недела во Светскиот економски изглед на ММФ. Индија е втора со 12,9%, а САД се очекува да придонесат со 11,3%.
ММФ проектира светската економија да порасне за околу 3% во следната половина деценија бидејќи повисоките каматни стапки влијаат на растот. Прогнозата за следните пет години е најслаба во повеќе од три децении, а фондот ги повикува земјите да избегнат економска фрагментација предизвикана од геополитичките тензии и да преземат чекори за зголемување на продуктивноста.
Вкупно 75% од глобалниот раст се очекува да биде концентриран во 20 земји, а повеќе од половина ќе бидат во првите четири: Кина, Индија, САД и Индонезија. Иако земјите од Групата седум ќе учествуваат со помал удел, Германија, Јапонија, Обединетото Кралство и Франција се меѓу првите десет учесници.
Бразил, Русија, Индија и Кина, познати како БРИК, се очекува да додадат речиси 40% од глобалниот раст до 2028-ма година.
Четирите земји го создадоа форумот БРИКС во 2009-та година, а блокот стана БРИК една година подоцна, кога Јужна Африка, досега најмалата економија во групата, беше примена.
Сепак, растот на Јужна Африка ќе биде слаб во следните пет години. Тоа ќе додаде приближно половина процентен поен на растот на глобалната економија.
