Докторот Александар Обедниковски, кој е директор во битолската болница каде починаа бебе и петгодишно дете, поднесува оставка од функцијата. Тој бил охрабрен да го стори ова од министерот за здравство Фатмир Меџити. Од министерскиот кабинет за „Макфакс“ посочуваат дека очекуваат истата и на писмено да ја добијат.
„Да, ние го охрабривме да поднесе оставка од морални причини“, велат од Кабинетот на министерот Меџити, кој денеска беше во контрола на битолската болница.
Го контактиравме и Обедниковски, само кратко ни одговори: „Поднесувам оставка од морални причини“.
За три недели, во битолската болница имаше два смртни случаи. Почина петгодишната Јана Христова, а причините за ова се уште се непознати. Обдукцијата не е завршена.
Нов смртен случај имаше вчера, кога почина штотуку родено бебе. Имало обид за реанимација – но неуспешен. Министерот за здравство информираше дека имало тахикардии – телото е дадено на обдукција.
