Жена убила три деца и тројца возрасни во приватно училиште во Нешвил

Во приватно христијанско основно училиште во Нешвил, САД, денеска се убиени три деца и тројца возрасни, додека младата жена која отвори оган е пронајдена мртва по вооружена пресметка со полицијата, соопштија официјални лица.

Во училиштето The Covenant, кое има околу 200 ученици од предучилишна до шесто одделение, три деца се здобиле со прострелни рани во нападот и лекарите можеле само да констатираат смрт.

Засега нема информации дали во нападот има повредени, како и дали жената која пукаше во децата и вработените во училиштето се самоубила или загинала во размената на оган со полицијата.

Другите ученици се евакуирани на безбедно. Тие го напуштија училиштето фатени за раце, опкружени со полициски автомобили, до блиската црква каде ги чекаа нивните родители.