„Toshiba“ ја прифати понудата за преземање од јапонски конзорциум, објави локалниот весник „Nikkei“. Со ова, иконскиот конгломерат е чекор поблиску до завршување на проблематичното поглавје во својата повеќе од 140-годишна историја, пишува „Bloomberg“.
Одборот на гигантот од Токио ја одобри понудата за 2 трилиони јени (15,3 милијарди долари) од група предводена од локалната инвестициска компанија за капитал „Japan Industrial Partners“, пишува јапонското издание, без да открие од каде потекнуваат информациите. Околу 20 јапонски фирми, вклучувајќи ги „Orix“, „Rohm“ и „Chubu Electric Power“, ќе учествуваат во откупот.
Овој потег би можел да стави крај на повеќегодишните турбуленции за познатата јапонска фирма, откако низа скандали ја оставија во тешка состојба и ја ставија на продажба. Раководството на „Toshiba“, јапонската влада и многу странски акционери на компанијата се во расправија околу иднината на конгломератот. Активистите инвеститори се обидуваат да го максимизираат приносот, додека државата има приоритет да ги држи чувствителната технологија и бизнис подалеку од странски раце.
„Да се има решение овде би било позитивно, бидејќи еден од проблемите на „Toshiba“ беше недостатокот на конзистентна стратегија поради постојаните промени во насоката“, коментира аналитичарот на „LightStream Research“, Мио Като.
Но, останува уште да се работи во смисла на воспоставување нови двигатели на растот и максимизирање на потенцијалот на некои од новите бизниси.
Од „Toshiba“ одбија да дадат коментар за ова прашање.
Сагата стана тест за корпоративното управување во Јапонија бидејќи голем број истакнати активисти инвеститори видоа можност и стекнаа удели во компанијата. Тие ги вклучуваат „Elliott Management“ на милијардерот Пол Стингер, „Oasis Management“ на Сет Фишер и фондовите со седиште во Сингапур, „Effissimo Capital Management“ и „3D Investment Partners“.
Некои од најголемите приватни компании размислуваа да поднесат понуди за преземање, вклучувајќи ги „Bain Capital“, „CVC Capital Partners“ и „KKR & Co“.
Бизнисот со нуклеарна енергија на „Toshiba“ се смета за важен за националната безбедност. Тој беше вклучен во деактивирањето на нуклеарната централа „Fukushima Dai-Ichi“, која се урна по земјотрес и последователно цунами во 2011-ва година. Ова ја спречи владата да прифати пренос на сопственоста на странска фирма.
Доколку се реализира продажбата, тоа ќе биде една од најголемите азиски зделки оваа година во време кога обемот на зделките се намалува.
