Од пазарот е повлечена една серија од бесеже вакцината на „Торлак“ која се дава на бебиња против туберкулоза. Лука Драгачевиќ, директор на овој институт кој со децении ја произведува вакцината БЦГ, во интервју за РТС објасни зошто дошло до повлекувањето.
Министерството за здравство на Србија соопшти дека на 16 март била повлечена количина од 834 ампули со вакцина поради минимално отстапување од строгите барања на спецификацијата на лекот. Истовремено, „Торлак“ ги снабди сите здравствени установи со бесеже вакцини, јавува РТС.
Од Министерството нагласуваат дека родителите немаат причина за грижа, бидејќи бебињата во породилиштата добиваат докажани безбедни вакцини.
Директорот на „Торлак“ вели дека повлекувањето на сериите лекови од оптек е вообичаена практика, а овојпат тоа се случило по внатрешна проверка во Институтот.
Бесеже вакцината се дава на бебињата во една доза и е т.н. жива вакцина.
„Видовме дека има одредени отстапувања во квалитетот на лекот. Иако неговата активност беше над 92 отсто, ние ги повлековме, тоа е нормално и се случува и во други земји. Апелирам до родителите, клиничките студии покажуваат дека нема потреба од грижа, дури и падот на активноста од 50 проценти не влијае на развојот на имунолошкиот одговор“, изјави Лука Драгачевиќ.
Веднаш по добивањето на резултатите, во рок од еден час, „Торлак“ ги известил сите институти и надлежните институции, пишува РТС.
„Има точна процедура за справување со вакви ситуации, ја задоволивме, за краток период беа информирани сите институти, кај нив вакцината беше ставена во карантин и во рок од 24 часа беше повлечена од територијата на цела република“, рече Драгачевиќ, нагласувајќи дека веднаш по распределбата на нова серија, така што немало никакви недостатоци.
Тој повторува дека нема причина за загриженост, бидејќи во некои земји критериумот за активност е околу 50 отсто, додека кај нас е 92 отсто.
„И со 50 проценти активност вакцината дава соодветен имунолошки одговор, имавме мало отстапување, поголемо е отстапувањето при апликацијата, но тоа е нешто што го налага регулативата“, рече Лука Драгачевиќ.
