„Nike“ во вторникот ги зголеми насоките за приходите за целата година, откако објави квартални резултати кои ги надминаа проценките. Сепак, компанијата предупреди на притисок врз маржите бидејќи продолжува да се разделува со вишокот залихи преку длабоки отпишувања.
Компанијата пријавува голема побарувачка за своите патики, вклучувајќи ги класичните стилови како „Jordan Retro“ и новите модели како „LeBron 20“, кои помагаат да го прошири својот удел на пазарот.
„Nike“ соопшти дека залихите на облеката се намалиле за една четвртина и очекуваат фискалната 2023-таа година да ја заврши со „здрави“ нивоа на залихи.
Акциите на „Nike“ паднаа за 2% во продолженото тргување во вторникот, откако компанијата соопшти дека очекува бруто-маржата во 2023-та година да падне за околу 250 базични поени, на долниот дел од нејзиниот претходен прогнозиран опсег.
Маржите на компанијата остануваат под притисок на силниот долар, повисоките логистички трошоци и напорите на „Nike“ да понуди подлабоки попусти за да се ослободи од вишокот залихи, рече главниот финансиски директор Метју Френд.
„Компанијата „Nike“ е во многу подобра позиција во однос на залихите отколку што беше во последните шест месеци“, рече Џесика Рамирез, виш аналитичар во „Jane Hali and Associates“.
Продажбата во Кина се намали за околу 8% во кварталот, иако земјата ги олесни ограничувањата поради Ковид-19, што се очекува да биде од корист за компанијата на краток рок.
Закрепнувањето на „Nike“ во Кина изгледа многу подобро од она на „Adidas“, кој се „распаѓа“ во земјата, вели аналитичарот на „Morningstar“, Дејвид Шварц.
„Nike“ сега очекува приходите за целата година да се зголемат помеѓу 7% и 9%, што е повеќе од претходната прогноза за раст помеѓу 4% и 6%.
Во четвртиот квартал, компанијата очекува растот на приходите да биде рамномерен или да забрза до 3 проценти, наспроти проценките за зголемување од 2,42 проценти, според податоците на „Refinitiv“.
„Nike“ објави приход во третиот квартал од 12,39 милијарди долари, надминувајќи ги проценките од 11,47 милијарди долари и заработка од 79 центи по акција, надминувајќи ги проценките од 55 центи.
