Иако „Samsung“ повеќе нема да произведува сопствени процесорски јадра за идните „Exynos“ мобилни чипови, тоа не ја спречи компанијата да објави нови премиум „Exynos“ чипови базирани на „ARM“ процесорски јадра.
Гласините сугерираат дека „Samsung“ работи на нов „Exynos“ чипсет, кој ќе користи јадра со дизајн на „ARM“. Сепак, иако тој дизајн ќе биде насочен кон највисокиот пазарен сегмент, премиум серијата телефони „Galaxy S24“ нема да ги користи тие чипови.
Ова го сугерираат најновите информации од свиркачот „@OreXda“. Според изворите, серијата „Galaxy S24“ нема да користи „Exynos“ чипови на ниту еден светски пазар.
Ова значи дека „Galaxy S24“, како и сегашната серија „S23“, ќе се потпира исклучиво на чиповите на „Qualcomm“, а претпоставката е дека тоа ќе биде „Snapdragon 8 Gen 3“.
Според претходните гласини, „Snapdragon 8 Gen 3 SoC“ би можел да има архитектура на јадра на процесорот 1 + 5 + 2, со едно мега-јадро Cortex-X4 тактизирано до 3,75 GHz, пет Cortex-A720 процесорски јадра на 3,0 GHz и два Cortex – A520 процесор со такт од 2,0 GHz.
Тековната серија „Galaxy S23“ ја прекина претходната двојност и поделба на пазари кои добиваат телефон со чипсет „Snapdragon“ или „Exynos“. Серијата „Galaxy S23“ има само „Snapdragon 8 Gen 2 SoC“ (специјален, оверклокиран модел за серијата на Samsung) за сите пазари.
Можно е ова партнерство помеѓу „Samsung“ и „Qualcomm“ да продолжи и за серијата „Galaxy S24“, но останува да биде официјално потврдено.
