„Rolex“ ќе постави три привремени производствени капацитети кои ќе започнат со производство на луксузни часовници во 2025-та година, бидејќи најголемиот светски производител на луксузни часовници се обидува да го зголеми производството во услови на невидена побарувачка за своите производи, пишува „Bloomberg“.
Изградбата на објектите во кантонот Фрибург ќе започне подоцна оваа година, се вели во е-поштата на „Rolex“. Капацитетот следи по плановите за распределба на 1 милијарда франци (1,1 милијарда долари) на нова голема производствена локација во Буле, во истиот кантон, која се очекува да започне со работа во 2029-та година.
Во моментов, новите часовници генерално не се достапни за веднаш купување преку овластената мрежа на компанијата, принудувајќи ги дилерите како „Watches of Switzerland Group“ да прибегнуваат кон листи на чекање на купувачи. Ова, исто така, доведе до пораст на цените на секундарните пазари, каде што популарните модели како што е „Daytona Cosmograph“ се тргуваат за вредности многу над малопродажните цени.
Претставниците на „Rolex“ рекоа дека работата на објект од 9.000 квадратни метри во Ромонт, Швајцарија, ќе започне во втората половина на 2023-та година, а производството се очекува да започне во 2025-та година. Исто така, ќе има привремен објект во индустрискиот парк Вивер во Вилаз Сен-Пјер, Швајцарија, кој ќе започне со работа во 2024-та година, како и центар за регрутирање во Буле.
Планот за зголемување на производството и привремените капацитети први го објавија швајцарските медиуми „La Gruyère“ и „La Liberté“.
„Rolex“ рече дека производствените линии ќе се инсталираат постепено, а регрутирањето ќе биде етапно и може да достигне од 250 до 300 вработени, од кои повеќето ќе бидат нови. Персоналот ќе биде обучен во Фромонт пред да биде префрлен во Буле кога локацијата таму ќе биде подготвена.
„Новата производствена локација во Буле, како и овие три привремени капацитети, ќе му овозможи на „Rolex“ да го прошири својот производствен капацитет, да го поддржи растот и да ја задоволи постојано зголемената побарувачка“, велат од компанијата.
„Rolex“ е контролиран од фондација именувана по нејзиниот основач Ханс Вилсдорф и произведува околу 1 милион часовници годишно, генерирајќи продажба од околу 8 милијарди франци, покажуваат проценките на „Morgan Stanley“.
