Претседателот на Русија, Владимир Путин, упати телеграма со честитки до Си Џинпинг по повод неговиот реизбор за претседател на Кина, соопшти прес-службата на Кремљ.
-Почитуван господине Си Џинпинг, драг пријателе, ве молам прифатете ги моите срдечни честитки за вашиот реизбор за претседател на Народна Република Кина. Одлуката на Националниот народен конгрес на Кина е доказ за признавање на вашите заслуги како лидер на државата, како и голема поддршка за вашата политика насочена кон натамошниот социјален и економски развој на Кина и заштитата на националните интереси во светската сцена – се вели во честитката објавена на веб-страницата на Кремљ.
Путин истакна дека Москва високо го цени личниот придонес на Си Џинпинг за зајакнување на односите на сеопфатно партнерство и стратешка соработка меѓу Москва и Пекинг.
-Сигурен сум дека со заедничка работа ќе обезбедиме развој на плодна руско-кинеска соработка во различни сфери. Ќе продолжиме да ја координираме заедничката работа за најважните прашања од регионалната и меѓународната агенда – рече рускиот лидер.
На крајот Путин на кинескиот лидер му посака нови успеси во професионалните активности за доброто на народот, како и добро здравје и благосостојба.
Си Џинпинг денеска беше едногласно избран за претседател на Народна Република Кина и за претседател на Централниот воен совет на Кина на тековниот 14. Национален народен конгрес. Тоа е негов трет петгодишен мандат и тој е единствениот претседател на Кина кој е избран по трет пат.
