Производителот на телекомуникациска опрема „Ericsson“ ќе укине 8.500 работни места ширум светот како дел од својот план за намалување на трошоците, се вели во меморандум испратен до вработените.
Додека технолошките компании како „Microsoft“, „Meta“ и „Alphabet“ укинаа илјадници работни места поради влошување на економските услови, одлуката на „Ericsson“ е поврзана со најголемото отпуштање во телекомуникациската индустрија.
„Начинот на кој ќе дојде до намалување на работната сила ќе се разликува во зависност од локалните практики во одделни земји. Во неколку земји, оваа недела веќе се соопштени отпуштањата“, рече извршниот директор Борге Еколм во текстот.
Во понеделникот, компанијата, која има повеќе од 105.000 вработени ширум светот, ги објави плановите за укинување на 1.400 работни места во Шведска.
Иако „Ericsson“ не откри кои земји ќе бидат најмногу погодени, аналитичарите предвидуваат дека Северна Америка најверојатно ќе има најголемо влијание, а пазарите во развој како Индија ќе бидат најмалку погодени.
Во декември, компанијата рече дека ќе ги намали трошоците за 9 милијарди круни (880 милиони долари) до крајот на 2023-та година, бидејќи побарувачката забавува на некои пазари, вклучително и Северна Америка.
„Наша должност е да ги намалиме овие трошоци за да останеме конкурентни“, рече Еколм во белешката.
Многу телекомуникациски компании ги зголемија своите залихи за време на шпицот на пандемијата, што сега предизвикува одложување на нарачките до производителите на телекомуникациска опрема.
„Verizon“, една од најголемите телекомуникациски компании, планира да потроши помеѓу 18,25 и 19,25 милијарди долари оваа година, што е под нејзиниот буџет за капитални расходи од 23 милијарди долари во минатата година.
Претходно, главниот финансиски директор на „Ericsson“, Карл Меландер, изјави дека намалувањето на трошоците ќе биде поврзано со намалувањето на бројот на консултанти, ќе влијае на имотите што ги користи компанијата, како и на бројот на вработени.
