„Филип Морис Интернешнл“ рече дека „претпочита да го задржи“ својот бизнис во Русија, наместо да го продава под строги руски услови, нагласувајќи ги предизвиците со кои се соочуваат компаниите кои се обидуваат да ја напуштат земјата без да претрпат огромен финансиски удар.
Извршниот директор на тутунската компанија Јацек Олчак изјави дека Филип Морис имал разговори со најмалку тројца сериозни потенцијални купувачи, но дека преговорите биле прекинати бидејќи не знаел како да го направи тоа, посочувајќи на регулативата за странските компании при продажбата, пренесува Фајненшл тајмс. Ова главно се однесува на вреднувањето на компанијата и пристапот до паричните текови.
Олчак изјави дека има обврска кон акционерите и дека не може наеднаш да го изгуби трпението и да ја напушти работата во Русија. „Тоа се нивни пари, а не мои. Да имав клиент кој може да ја направи трансакцијата, ќе го направевме тоа, но клиент не постои. Нема надеж. Затоа повеќе би сакал да ја задржам оваа работа“, изјави извршниот директор на компанијата.
И покрај големиот број мултинационални компании кои ветија дека ќе ја напуштат Русија по нејзината инвазија на Украина, многу од нив сè уште работат во таа земја, една година по почетокот на војната. Според истражувањето на Меѓународниот институт за развој на менаџментот, помалку од девет отсто од компаниите од земјите на ЕУ и Г7 ја напуштиле Русија до крајот на минатата година.
Империјал Брендс, производителот на цигарите Давидоф, ги продаде своите руски операции на локален партнер веднаш по инвазијата, со годишен профит од 463 милиони долари. Во исто време, Јапан Тобако нема намера да замине, додека Бритиш Американ Тобако се обидува да најде купувач за својот бизнис во Русија.
