„Ford Europe“ се соочува со нови големи кратења на работни места. Како што објави американската компанија во вторникот во Келн, во следните три години ќе бидат укинати вкупно 3.800 работни места во различни европски оддели на концернот. Тоа е околу 11 отсто од сегашните 34.000 вработени во европската филијала на американската автомобилска компанија.
Германската филијала на „Ford“ е несразмерно погодена од новите планови на автомобилскиот производител за намалување на трошоците. До крајот на 2025-та година во Германија ќе бидат укинати околу 2.300 работни места. Ова е околу 12% од сегашната работна сила на „Ford“ од околу 19.000 луѓе во оваа земја.
Покрај Германија, „Ford Europe“ сака да заштеди и во Велика Британија. Таму во следните неколку години ќе бидат укинати околу 1.300 работни места. Уште 200 вработувања во помалите европски застапници на „Ford“ се исто така дел од новата програма за штедење.
Кратењата главно ќе ги погодат одделите за развој. Дополнително, ќе се остварат заштеди и во административната сфера.
Компанијата има околу 45.000 вработени во Европа, со најголема фабрика во Келн, каде што работат околу 14.000 луѓе. Во Обединетото Кралство, компанијата има околу 7.000 вработени со договор кои произведуваат дизел мотори во Дагенхам и менувачи во фабриката Хејлвуд. Има и инженерски центар во Дантон, Есекс. Компанијата има намера да направи отпуштања преку доброволни договори.
Потврдата на американскиот производител за дополнителни намалувања во Европа следи по продолжениот период на пад на неговиот бизнис во регионот. За време на годините на реструктуирање, голем број погони беа продадени или затворени поради големи кратења на работни места. Пазарниот удел на компанијата на пазарот на патнички автомобили минатата година изнесуваше 4,4%, а продажбата изнесува нешто повеќе од 510.000 автомобили, покажуваат податоците на Европската асоцијација на производители на автомобили.
Следна на ред за затворање е фабриката на „Ford“ во Сарлуис, Германија, каде што 4.600 работници го произведуваат моделот „Focus“. Производителот на автомобили ќе го прекине производството на автомобилот до 2025-та година, без планови да произведува други автомобили таму потоа. Според луѓе запознаени со ова прашање, компанијата е во преговори со потенцијалните купувачи на фабриката, вклучувајќи ја и кинеската „BYD Co“.
