Претставниците на Федералните резерви во средата го направија своето осмо зголемување на каматните стапки за една година, бидејќи велат дека продолжуваат да се борат со брзата инфлација. Каматните стапки, кои се зголемени за четврт поен, ќе ја подигнат вкупната референтна стапка помеѓу 4,50 и 4,75 отсто.
Гласањето беше едногласно и официјалните лица повторија дека „сегашната“ промена на стапката би била соодветна. Во соопштението на Федералните резерви се наведува дека инфлацијата „донекаде се намалила“.
„Последните показатели укажуваат на умерен раст на потрошувачката и производството. Растот на работните места е силен во последните месеци, а стапката на невработеност остана ниска. Инфлацијата донекаде се намали, но сепак е висока“, се вели во соопштението.
Тие тврдат дека руската војна против Украина предизвикува огромни човечки и економски тешкотии и придонесува за зголемување на глобалната несигурност.
Комитетот предвидува дека тековните зголемувања на целниот опсег ќе бидат соодветни за да се постигне став на монетарната политика што е доволно рестриктивна за да ја врати инфлацијата на 2 проценти со текот на времето.
„При одредувањето на степенот на идните зголемувања на целниот опсег, Комитетот ќе го земе предвид кумулативното заострување на монетарната политика, заостанувањата со кои монетарната политика влијае на економската активност и инфлацијата, како и на економските и финансиските движења“, соопшти ФЕД.
Инаку, тоа е најмалата корекција од март, имајќи предвид дека Федералните резерви ги зголемија трошоците за задолжување со најбрзо темпо од 80-тите години на минатиот век, додека официјалните лица се обидуваа да ја „оладат“ економијата и да ја намалат инфлацијата со забавување на побарувачката на потрошувачите и бизнисите.
Официјалните лица во претходните месеци рекоа дека квотата, или проценетата „терминална стапка“ на која каматните стапки ќе запрат, е 5,1 отсто.
