Истражувањето на „IDC Smartphone Tracker“ бележи славен рекорд кога станува збор за испораките на телефони.
Во текот на четвртиот квартал од 2022-ра година, глобалната испорака на паметни телефони падна за 18,3 отсто, со испорачани 300,3 милиони уреди, се вели во извештајот.
Сите пет најголеми брендови на пазарот на телефони забележаа двоцифрени загуби на годишна основа во однос на четвртиот квартал од 2021-ва година. Споменатите резултати претставуваат најголем тримесечен пад од 2013-та година.
Вкупно 1,21 милијарди телефони беа испорачани во цела 2022-ра година, во споредба со 1,36 милијарди испорачани во 2021-ва година.
Во текот на четвртиот квартал, „Apple“ ја предводеше испораката со 72,3 милиони испорачани „iPhone“ модели и пазарен удел од 24,1 отсто.
Следи „Samsung“ со испорачани 58,2 милиони телефони (19,4% удел на пазарот), а потоа и „Xiaomi“ со испорачани 33,2 милиони телефони. На четврто и петто место се „Oppo“ и „Vivo“.
Аналитичарите на „IDC“ сугерираат дека зголемената инфлација е главната причина за падот на испораките на телефони, како и помалата потрошувачка.
Покрај тоа, корисниците сега повеќе се држат до постарите уреди, така што циклусот на тргување и купување сега се зголеми на 40 месеци (3,3 години) за некои корисници.
