На Доналд Трамп ќе му биде дозволено да се врати на социјалните мрежи Фејсбук и Инстаграм, откако Мета објави крај на двегодишната суспензија на неговите профили.
„Суспензијата ќе истече во следните недели“, рече Ник Клег, шеф за глобални прашања во компанијата за социјални медиуми.
„Јавноста треба да може да слушне што зборуваат политичарите“, додаде тој.
На поранешниот американски претседател му беа суспендирани профилите на Фејсбук и Инстаграм по насилните демонстрации во Вашингтон на почетокот на 2021 година.
Компанијата донесе одлука за суспензија откако Трамп ги „пофали луѓето кои го предизвикаа насилството во Капитол“, објасни Клег.
„Суспензијата беше вонредна одлука донесена во вонредни околности“, рече претставникот на Мета.
Клег вели дека по новата анализа било утврдено дека профилите на Трамп повеќе не претставуваат сериозен ризик за јавната безбедност.
Но, поради претходните „прекршоци“ на Трамп, доколку ги повтори, се соочува со уште построги казни.
Членови и функционери на американската Републиканска партија извршија притисок на Трамп да му се дозволи повторно да го активира својот профил на Фејсбук додека се подготвува за уште една претседателска кандидатура следната година.
Трамп ја коментираше одлуката на Мета во објава на сопствената социјална мрежа наречена Truth Social.
Тој напиша дека Фејсбук „изгуби милијарди“ откако го суспендираше „вашиот омилен претседател, јас“.
„Такво нешто никогаш повеќе не треба да му се случи на актуелент претседател или на некој што не заслужува одмазда“, рече тој.
