Доколку го следите меѓународниот фудбал, тогаш со сигурност знаете дека Кристијано Роналдо неодамна потпиша нов договор со Реал Мадрид со кој ќе заработува 21 милион евра годишно.
Португалецот е голем љубител на моделите на Ферари, па потпишувањето на новиот договор го прославил со уплата на аванс за новиот „LaFerrari“. Гласините се многу прецизни, затоа што се наведува и која боја Кристијано ја има избрано, а станува збор за сината. Се тврди дека тој автомобилот го порачал преку португалското претставништво на Ферари, а испораката е закажана за почетокот на наредната година.
Па така играчот на мадридскиот тим ќе може да ужива во суперавтомобилот со 6.3 литарскиот V12 мотор и „KERS“ единицата наречена „HY-KERS“. „LaFerrari“ има 950 KS и 900 Nm вртежен момент, што ќе му овозможи максимална брзина од 350 km/h, додека за забрзувањето до „стотка“ му е потребно помалку од три секунди.
„LaFerrari“ е првиот модел на компанијата од Маранело уште од контроверзниот „Dino 308 GT“ од 1973-та, за чии дизајн не се потпишува „Pininfarina“.
Кога започна нарачувањето на „LaFerrari“, шефот на компанијата, Лука Ди Монтеѕемоло потврди дека идните сопственици треба да исполнат еден услов, а тоа е во своја сопственост да имаат пет модели на Ферари. Роналдо досега е веќе гледан со две различни возила од моделот „599 GTB“ (oд кои едниот го има уништено), како и со „575“ и „599 GTO“. Можеби тој некаде крие уште една „458 Italiа“ или „Californiа“?