Благите зими и недостатокот на снег имаат негативно влијание врз скијачките центри низ Европа, бидејќи нивната работа зависи од ниските температури и снежната покривка, пишува Euractiv.
Покрај климатските проблеми, скијачките центри се соочуваат и со високи цени на енергијата.
Во Европа има околу 3.900 скијачки центри, од кои повеќето се наоѓаат во Германија, Италија, Франција и Австрија.
На почетокот на 2023 година во Европа беа забележани рекордни температури.
Метеоролозите посочуваат дека европските зими стануваат поблаги, посуви и со помалку врнежи.
Во Италија, операторите на жичарниците изгубија околу 40 отсто од сезонскиот сообраќај за време на Божиќ поради недостаток на снег.
Некои земји се обидуваат да помогнат со субвенции или даночни олеснувања, но многу скијачки центри на пониска височина можеби ќе треба да се затворат во следните неколку години.
„Веќе сме сведоци на потопли зими, кои ќе ескалираат по 2030 година и дополнително ќе ги влошат условите за скијање“, наведува Словачкиот институт за политика за заштита на животната средина.
Пред крајот на векот одржливи ќе бидат само скијачките центри на голема надморска височина, пишува во својата анализа институтот.
Некои од земјите веќе насочија одредена помош кон скијачките центри.
Во Италија веќе се доделени 200 милиони евра за финансирање на модернизацијата и безбедноста на ски-лифтовите и објектите за правење снег.
Сепак, италијанското здружение на жичарници Федерфуни бара итна помош во однос на цената на електричната енергија, на пример во форма на даночни олеснувања.
Овој вид помош веќе е одобрен во Словачка, каде ДДВ за скијачките центри е намален за 10 отсто.
Француските скијачки центри, од друга страна, се жалат дека владините шеми за помош ги заобиколија, што доведе до „експлозија на сметките за струја“.
Покрај актуелната енергетска криза, потребни се и долгорочни решенија.
Мартин Коки од чешкиот ски-центар Клиновец смета дека некои ски центри можеби ќе мора делумно да се преориентираат на летната сезона.
„Се надевам дека можеме да отвориме прагматична дискусија за тоа како да ги трансформираме планинските региони кои се зависни од туризмот во дестинации во текот на целата година“, рече тој.
Во Австрија, бројот на денови со целосна снежна покривка е намален во просек за 40 дена од 1961 година. Падот е особено драстичен на надморска височина под 1.500 метри.
Времетраењето на природната снежна покривка на надморска височина до 1.000 метри би можело да се намали за 70 отсто до 2100 година, доколку затоплувањето не се ограничи на 2 Целзиусови степени, покажува студијата спроведена од Универзитетот во Инсбрук.
Доколку скијачките центри не можат да сметаат на природен снег во зима, единствена опција е вештачкиот снег.
„Ќе бидат потребни огромни инвестиции во модерна технологија и резервоари за задржување вода“, рече Мартин Коки.
